დაარეგისტრირეთ სასაქონლო ნიშანი ონლაინ

სასაქონლო ნიშნის რეგისტრაციისას „აღნიშვნა“ გულისხმობს ლოგოს, სლოგანს, ბრენდის ან კომპანიის სახელს.

სასაქონლო ნიშნის საქპატენტში რეგისტრაცია სრულად ელექტრონულად, საკუთარი ოფისიდან გაუსვლელად არის შესაძლებელი. რეგისტრაციის განაცხადის მისაღებად, თქვენ უნდა მიუთითოთ ძირითადი ინფორმაცია სასაქონლო ნიშნის უფლებების მომავალი მფლობელის შესახებ: კომპანიის სახელი, იურიდიული მისამართი და სასაქონლო ნიშნის აღნიშვნა.

სასაქონლო ნიშნის რეგისტრაციის სრულ პროცესს დაახლოებით 10-12 თვე სჭირდება. ყველაზე დიდი დრო იმის გადამოწმებას სჭირდება, იდენტური ან მსგავსი სასაქონლო ნიშანი უკვე არსებობს თუ არა ან სარეგისტრაციოდ ხომ არ არის წარდგენილი. აგრეთვე მოწმდება სასაქონლო ნიშნის შესაბამისობა საქართველოში მოქმედ კანონმდებლობასთან და საერთაშორისო ხელშეკრულებებთან.

საქპატენტი გთავაზობთ სასაქონლო ნიშნის რეგისტრაციის პროცესის დაჩქარების სერვისს, რომლის საფასური ერთი ნიშნისთვის ერთ კლასში შეადგენს - 840 აშშ დოლარის ეკვივალენტს ლარში. თუმცა, სასაქონლო ნიშნის დაჩქარებული რეგისტრაციის განაცხადი სამომავლოდ, შესაძლოა, გასაჩივრდეს მოგვიანებით მიღებული საერთაშორისო ან ადგილობრივი სასაქონლო ნიშნების განაცხადის საფუძველზე.

სასაქონლო ნიშანთან დაკავშირებული უფლებები იურიდიულად წარმოიშობა სასაქონლო ნიშნის საქპატენტის მიერ დამტკიცებისა და რეგისტრაციის მომენტიდან. მესამე პირთა მხრიდან სასაქონლო ნიშნის უფლებებთან დაკავშირებით პრეტენზიების თავიდან აცილების მიზნით, რეკომენდებულია, სასაქონლო ნიშნის გამოყენება რეგისტრაციისთანავე. კანონი არ კრძალავს აღნიშვნის (სახელის, ლოგოს) გამოყენებას განაცხადის პროცესის მიმდინარეობისას ან თუნდაც რეგისტრაციის გარეშე, თუმცა ისეთი აღნიშვნის გამოყენება, რომელიც ჯერ არ არის რეგისტრირებული სასაქონლო ნიშნად, შესაძლოა შეიცავდეს გარკვეულ სამართლებრივ რისკებს.

მიუხედავად იმისა, რომ სასაქონლო ნიშნის გადამოწმებისა და რეგისტრაციის სრულ პროცესს დაახლოებით ერთი წელი სჭირდება, განხილვის პერიოდში სასაქონლო ნიშანი დროებით იქნება დაცული. თქვენს განაცხადს შეტანის მომენტიდან პრიორიტეტი ენიჭება, რაც ბუნებრივად გულისხმობს, რომ მესამე პირის მსგავსი ან იდენტური სასაქონლო რეგისტრაციის ახალ განაცხადს საქპატენტი აღარ განიხილავს.

მას შემდეგ, რაც სასაქონლო ნიშანი საქპატენტში დარეგისტრირდება, ის დაცულია საქართველოს ტერიტორიაზე. სხვა ქვეყნებში დაცვის უზრუნველსაყოფად, საჭიროა დამატებითი საერთაშორისო განაცხადის ან ცალკეული განაცხადების სხვა ქვეყნების ინტელექტუალური საკუთრების ცენტრების ოფისებში შეტანა.

სასაქონლო ნიშნის ერთიანი „მსოფლიოს მასშტაბით“ რეგისტრაციის სერვისი არ არსებობს, თუმცა შეგიძლიათ სასაქონლო ნიშანი სხვა ქვეყნების ინტელექტუალური საკუთრების ოფისებში ცალკეული განაცხადების შეტანის გზით დაარეგისტრიროთ ან ისარგებლოთ მადრიდის სისტემით, რომლის დახმარებითაც ერთ ენაზე, ერთი განაცხადის წარდგენით, შეგიძლიათ მოიცვათ სასაქონლო ნიშნის დაცვის ფართო გეოგრაფიული არეალი - ინტელექტუალური საკუთრების მსოფლიო ორგანიზაციის (ისმო) წევრი 116 ქვეყანა.